Geburtstag is, un ahh en runde,
Der ganzen Welt sei dies zur Kunde,
Gefeiert werd’s, do kannscht nix mache.
An demme Dag, do loss mers krache.

Drum wärd der ganz groß uffgezoche,
Denn so kummt ah die ganz Mischpoche,
All die Promis werren kumme,
Unn es gibt ah was fer umme.

Denn Reklame muss jo soi,
Unn des bei Esse, Bier unn Woi,
Unn mer kann ah net verhehle,
Do derf debei de Sekt net fehle.

Der Jubilar wärd hoch gepriese,
Unn sichtbar dud er des genieße.
Ma mänt, ein lebendes Schenie!
Man gibt sich ewe ganz viel Mieh.

Unn alles hot a noch en Clou,
Weil die Verwaltung hot jetzt zu.
Zum Feiere de Mäschter rief,
Unn dodebei sinn all aktiv.

Der sunnt sich bräd in demme Glanze,
Wohl gelungen is des Ganze.
In all dem Lob dud er sich aale,
Die Froch is nur: Wer wärd des alles do bezahle?

Dieter Salzmann